Waxaa sii xoogeysanaya olole lagu doonayo in taallo loogu diso ciyaaryahan madow ahaa oo 95 sano kahor loo diidday inuu u dheelo xulka England. Jack Leslie ayaa sanadkii 1925-kii filayay inuu u safan doono xulka England, 53 sano kahor inta aanu fursaddaasi helin ninkii ugu horreeyay ee madow ah Viv Anderson.

Xilligii uu Leslie geeriyooday 1988, waxaa kooxaha kubadda cagta ee Englad kusoo badanayay ciyaaryahanno madow ah.

Jack Leslie ayaa sanadkii 1900 ku dhashay Canning Town oo ka tirsan caasimada London. Hooyadii waxay ahayd Caddaan, aabihiina madow Jamaica kasoo jeeday. Laacibnimadiisa kubadda cagta ayaa u suuragelisay inuu u dheelo kooxda Barking Town, kadibna waxa uu ku biiray Plymouth Argyle oo xilligaasi ka dheeli jirtay horyaalka heerkiisa saddexaad, waxaana uu u ciyaarayay muddo 14 sano ah isagoo u dhaliyay 137 gool.

Waxaa lagu xusuustaa inuu ahaa weeraryahan baalka bidix kasoo gala goosha, mararka qaarna difaaca uga dheeli jiray kooxdiisa.

Yeeritaankii xulka England

Sanadkii 1925 tababarihii Plymouth, Bob Jack ayaa laacib Leslie ku wargeliyay inuu magaciisa u gudbiyay xulka qaranka, isla markaana uu u safan doono kulanka ay la dheeli doonaan Ireland. Waxa ay ahayd guul weyn oo usoo hoyatay ciyaaryahankaasi iyo weliba kooxdiisa.

Warkaasi ayaa ku faafay magaaladii uu degannaa, balse maalmo kadib markii wargeyska uu daabacay magacyada xulka England ee la dheelayay Ireland, Leslie waxa uu kamid ahaa ciyaartooyda keydka ah ee kooxda raacayay. Waa uu diidday inuu la safro kooxdii u socotay Belfast, taa bedalkeedana waxa uu u haray kooxdiisa. Maalintaasi England waxa ay barbaro gool la’aan ah la dhaafi weyday Ireland, halka Leslie uu kooxdiisa u dhaliyay laba gool, kulan ay 7-2 uga badisay Bournemouth oo marti u ahayd.

“Waxaan rumaysanahay in tababarihiisa uu diray codsiga, isagoo sheegay in Leslie yahay laacib heer sare ah oo mudan inuu u dheelo England, balse dadkii loo soo diray inay daawadaan ciyaartiisa ayaa ku qanci waayay midabka jirkiisa,” ayay tiri Lesley Hiscott oo uu awoow u yahay.

Inkastoo uu Leslie gacan weyn ka siiyay kooxdiisa Plymouth inay u gudubto heerka labaad ee horyaalka, kabtanna u ahaa, ayaa haddana waxaa u suurageli weyday inuu u safto xulka England. Viv Anderson oo noqday ciyaaryahankii madow ah ee markii ugu horreysay u safta England ayaa sanadkii 1978-kii waxa uu dheelay kulankii uu xulkaasi la lahaa Czechoslovakia ee ka dhacay garoonka Wembley.

“Waxaan markii ugu horreysay taariikhda Jack Leslie maqlay laba todobaad uun kahor, waa ceeb weyn, waayo guulaha uu gaaray awgood waxay ahayd inuu ku faano laacib kasta oo madow ah,” ayuu Anderson BBC-da u sheegay.

Taallada

Anderson ayaa sheegay inuu filayo in taallada la doonayo in loo dhiso Jack Leslie ay soo nooleyn doonto guulihiisa taariikhiga ah. Kooxda Plymouth ayaa qolkeeda shirarka ugu magac-dartay Leslie, qaar kamid ah taageerayaasha kooxdana waxay kaalin muuqata ku leeyihiin ololaha taallo dhisidda.

“Xilli taallooyinka qaar la duminayo, waxaan dooneynaa inaan taallo maamuus ah u dhisno Jack Leslie oo aan ku sharafno guulihii uu gaaray, isla markaana aan garawsanno cadaallad darradii uu la kulmay,” ayuu yiri Greg Foxsmith oo kamid ah dadka billaabay ololaha. Ololaha ayaa rajeynayaa inuu helo lacag dhan £100,000, dadka ku hawlanna waxaa kamid ah Anderson iyo hawlwadeennada kooxda Plymouth.

Facebook Comments